Përballja mes Anthony Joshua dhe Jake Paul kishte skeptikë para, gjatë dhe pas ndeshjes, por një zë kritik erdhi nga një figurë krejt e papritur i cili ishte arbitri i duelit.

Joshua e mbylli ndeshjen me nokaut në raundin e gjashtë ndaj YouTuberit të kthyer në boksier, në Kaseya Center në Miami.

Jake Paul u pa qartë jashtë nivelit në këtë përballje, duke kaluar pjesën më të madhe të ndeshjes duke vrapuar rreth ringut të zgjeruar, pa u angazhuar realisht me ish-kampionin e dyfishtë botëror të peshave të rënda.

Sa herë që afrohej në distancë goditjeje, amerikani zgjidhte të kapte dhe të “luftonte” Joshuan nga këmbët, në vend që të shkëmbente grushte.

Këto taktika irrituan jo vetëm Joshua-n, por edhe publikun në sallë, me fishkëllima që jehonin në të gjithë Kaseya Center.

Situata u bë aq frustruesе saqë edhe arbitri Chris Young e humbi durimin.

Gjatë raundit të katërt, Young i thirri të dy boksierët në qendër të ringut për t’i paralajmëruar ashpër.

“Ejani këtu të dy. Dëgjoni, kjo duhet të ndalet. Tifozët nuk kanë paguar për të parë këtë shfaqje të turpshme. Nëse do të luftoni, luftoni, por brenda rregullave.”

Dy raunde më vonë, gjithçka mori fund. Joshua e mbylli ndeshjen me nokaut, ndërsa Jake Paul pësoi një dëmtim serioz, dy fraktura në nofull.

Pas ndeshjes, Paul konfirmoi se do të marrë një pauzë nga boksi, por nuk e fshehu ambicien për të synuar titullin botëror në peshën cruiserweight.

“Do të marr pak pushim. Kam shtyrë fort për gjashtë vite. Do të pushoj pak. Kjo është e jashtëzakonshme. Do ta shërojmë nofullën e thyer, do të kthehem dhe do të luftoj me njerëz të peshës sime,” deklaroi ai.

Paul shtoi gjithashtu se Joshua është një luftëtar i madh.

“Anthony Joshua është një luftëtar i madh. U munda, por ky është boksi. Do të rikthehem dhe do të vazhdoj të fitoj. Kam fituar në çdo aspekt të jetës sime, familjen, të fejuarën time të mrekullueshme – dhe ky sport më ka ndihmuar shumë në jetën time”, u shpreh Paul./Arbresh.info